\r\n

انا والحراميه

\r\n

\r\n

بقلم الفنان المسرحي زيا ديشو البازي

\r\n

\r\n

فد يوم صبحيه

\r\n

براس الفرع لاكتني  دوريه

\r\n

قسم لابسين ملابس مدنيه

\r\n

ثلاثه لو اربعه انضباطيه

\r\n

واحد لابس منقط او حاطله بيريه صاح بيه

\r\n

تعال لك شوفلي الهويه

\r\n

انطيته كل اوراقي

\r\n

كتله هاي بطاقتي الشخصيه

\r\n

هاي الاحوال المدنيه

\r\n

هاي البطاقه التموينيه

\r\n

هاي الورقه استلم بيهه الطحين شهريه

\r\n

هاي شهادتي المدرسيه

\r\n

خريج كليه قسم السلام للانسانيه

\r\n

او هاي شهادتي الجنسيه

\r\n

تاكد ان ابوي عراقي وامي عراقيه

\r\n

كال لعد ليش مكتوب بخانة القوميه اثوريه

\r\n

مبين انته مزور الجنسيه

\r\n

كتله لا عمي هاي الاصليه

\r\n

ادا ما تصدك اتصل بالمديريه

\r\n

هومه يكلولك اذا مزوره لو حقيقيه

\r\n

كام فتش بجيوبي وباك الخرجيه

\r\n

او لكه شويت صور شخصيه

\r\n

كال منو ذوله اكيد فراريه

\r\n

\r\n

كتله لا خالي هاذه ابن عمي استشهد بالجبهه الشرقيه

\r\n

وهاذه اخوي استشهد بالقادسيه

\r\n

وهاذه صديقي استشهد من اجل الامه العربيه

\r\n

كال ذوله الثلاثه منو مبين عليهم افنديه

\r\n

كتله هاذه يوسف وهاذه يوخنا

\r\n

وهاذه يوبرت ترك زوجه كلهه طيبه او حنيه

\r\n

او طفلين بعدهم بالدوديه

\r\n

ذوله هم شهداء بس ذوله استشهدو من اجل قضيه

\r\n

ذوله احفاد اغا بطرس

\r\n

امتدادهم من سميل وصوريه

\r\n

كال كافي اني ما اعرف ها الشغلات التاريخيه

\r\n

بس الاعرفه انتو الاثوريه

\r\n

كولكم جواسيس للامبرياليه

\r\n

انتو اصلن مو عراقيه

\r\n

كتله لعد اشور وسنحاريب وحمورابي منين

\r\n

من صين الشعبيه

\r\n

او سومر وبابل واكد ونينوى منو بناها

\r\n

شركه يابانيه

\r\n

تعال فهم هيج متخلف العقليه

\r\n

حسيت بعد ما اكدر اعيش ويه الحراميه

\r\n

شكيت كل اوراقي او رحت للسفاره الكنديه

\r\n

\r\n

\r\n

Leave a Reply اضف تعليق

الارشيف
التعليقات
التسجيل في موقعنا

google